Өфөлә Татарстан Республикаһы көндәре уҙғарыла

ӨФӨ, 2019 йыл, 28 февраль. /«Башинформ» мәғлүмәт агентлығы, Ләйлә Аралбаева/. 2019 йылдың 17-18 апрелендә Өфөлә Татарстан Президенты Рөстәм Миңлеханов һәм Башҡортостан Башлығы вазифаһын ваҡытлыса башҡарыусы Радий Хәбиров ҡатнашлығында Татарстан Республикаһы көндәре уҙа. Саралар Башҡорт АССР-ы ойошторолоуға 100 йыл тулыуҙы билдәләүгә арнала. Был хаҡта Татарстандың Башҡортостандағы даими вәкиле Ранэль Зиннәтуллин хәбәр итте.

Ике туғандаш республиканың башлыҡтары Өфөлә бер нисә сәнәғәт предприятиеһына, Өфө дәүләт нефть техник университеты һәм Өфө дәүләт авиация техник университеты технопарктарына бара.

«Татарстан – Башҡортостан» эшҡыуарлыҡ форумын, унда «Машиналар эшләү», «Нефть сәнәғәте», «Һаулыҡ һаҡлау», «Мәғариф», «Ауыл хужалығы», «Энергетика» һәм «Туризм» кеүек йүнәлештәр буйынса түңәрәк өҫтәлдәр уҙғарыу күҙаллана. Шулай уҡ Татарстан артистары ҡатнашлығында сәнғәт оҫталары концерты була.

17 апрелдә Татарстан Президенты татар шағиры Ғабдулла Туҡайға һәйкәл асыу тантанаһында ҡатнаша. Һәйкәл Өфө «Нур» татар дәүләт театры алдындағы майҙанда ҡуйыла.

Шулай уҡ мәҙәни-күңел асыу һәм спорт саралары: концерттар, күргәҙмәләр, түңәрәк өҫтәлдәр, Башҡортостан һәм Татарстан командалары араһында көрәш буйынса ярыштар, футбол һәм волейбол уйындары ҡаралған.

Башҡорт АССР-ының 100 йыллығын байрам итеү барышында ике республиканың милли командалары ветерандары ҡатнашлығында хоккей уйыны ла ойошторола.