Билдәле спортсы Джефф Монсон башҡортса йырлай башлаған

ӨФӨ, 2018 йыл, 17 декабрь. /«Башинформ» мәғлүмәт агентлығы/. Яңыраҡ Өфөлә булып киткән ҡатнаш көрәш сәнғәте (ММА) спортсыһы һәм Красногорск ҡала советы депутаты Джефф Монсон башҡортса йырлай башлаған. «Үҙгәреш — беҙҙең йөрәк талабы, үҙгәреш — беҙҙең күҙҙәр талабы», — тип башҡортса йырланы ул Виктор Цойҙың «Хочу перемен!» йырының ҡушымтаһын. Шул рәүешле танылған көрәшсе һәм Рәсәй сәйәсмәне Башҡорт теле көнөнә ҡарата флешмобты хуплауын белдерҙе.

Хәтерегеҙгә төшөрбәеҙ, «Башинформ» агентлығының директорҙар советы рәйесе Ростислав Мырҙағолов Башҡорт теле көнөнә ҡарата флешмоб иғлан итте. Социаль селтәргә #деньбашкязыка, #яратамбашкортостанды, #башкруто хэштегтары менән бик күп башҡортса роликтар һалынды. Флешмобҡа Валерий Меладзе ҡушылды.