Башҡортостандың иң яҡшы тәрбиәсеһе Стәрлетамаҡ балалар баҡсаһында эшләй

ӨФӨ, 2018 йыл, 7 ноябрь. /«Башинформ» мәғлүмәт агентлығы, Эльмира Сабирова/. Стәрлетамаҡтың 77-се балалар баҡсаһында өлкән тәрбиәсе булып эшләүсе Мария Заплохова Башҡортостандың иң яҡшы тәрбиәсеһе тип танылды. Бөтә республиканан 50-нән ашыу мәктәпкәсә белем биреү педагогы ҡатнашҡан конкурсҡа Өфөлә йомғаҡ яһалды. Еңеүгә юл үҙеңдең интернет-ресурсың һәм белем биреү проекттарың менән таныштырыу, практик саралар, оҫталыҡ дәрестәре аша үтте. Конкурс финалсыларын республиканың мәғариф министры Әминә Шафиҡова ҡатнашлығында түңәрәк өҫтәлдә һөнәри һөйләшеү көттө. Жюри бәйгеселәрҙең эшен – нисек дәрес уҙғарыуын, һөнәри табыштар барлығын һәм педагогик талантын бер ай буйына күҙәтте.

«Тамашасы һөйөүе призы» тағы бер Стәрлетамаҡ вәкиле Дания Тайсинаға тейҙе. Интернетта уның өсөн 56,3% ашыу тауыш бирелгән. Ул 11-се балалар баҡсаһында эшләй.

Призерҙар иҫәбендә Дүртөйлөнән 10-сы «Ләйсән» балалар баҡсаһы тәрбиәсеһе Светлана Ғәлиева, уның коллегаһы Туймазының 21-се мәктәпкәсә белем биреү учреждениеһынан Ләйсән Абсатарова һәм Салауат районының Йыланыш ауылы төп дөйөм белем биреү мәктәбенең мәктәпкәсә төркөм тәрбиәсеһе Елена Брагина.

Шулай уҡ номинацияларҙа еңеүселәр һайлап алынды.

«Ошондай конкурстар кәрәк, сөнки бөтә ҡатнашыусылар бындай бәйгеләрҙән һуң хушлашмай – беҙ телефондар менән алмашындыҡ, шылтыратышып, кәңәшләшеп торасаҡбыҙ. Шул рәүешле үҙебеҙҙең оҫталыҡ кимәлен күтәрәбеҙ».

http://www.bashinform.ru/news/1234802-luchshiy-vospitatel-bashkirii-rabotaet-v-detskom-sadu-sterlitamaka/