Республикала 400 килограмға яҡын сифатһыҙ икмәк-ҡалас һәм кондитер изделары тартып алынған

ӨФӨ, 2018 йыл, 26 октябрь. /«Башинформ» мәғлүмәт агентлығы, Эльмира Сабирова/. Башҡортостандың сауҙа нөктәләрендә 400 килограмға яҡын сифатһыҙ икмәк-ҡалас һәм кондитер изделиелары һатыуҙан алынған. Өсөнсө кварталда Роспотребнадзор белгестәре етештереүҙән ҡулланыусыға еткереүгә тиклемге барлыҡ стадияларҙа сифат һәм хәүефһеҙлек тикшереүҙәрен үткәргән. Ошо осорҙа санитар-химик һәм физик-химик күрһәткестәр буйынса 1720 проба тикшерелгән.

Икмәк продукцияһында санитар-химик күрһәткестәр буйынса ҡәнәғәтләнерлек булмаған пробалар асыҡланмаған. Тикшереү үткән икмәк-ҡалас изделиеларының 2,9 проценты һәм кондитер изделиелары өлгөләренең 4,3 проценты физик-химик күрһәткестәргә тап килмәгән.

Икмәк һәм ҡалас пробаһында гендары үҙгәртелгән организмдар (ГМО) табылмаған. Кондитер изделиеларына килгәндә, санитар табиптар 20 проба алған һәм өлгөләрҙең 5 процентында ГМО тапҡан.

Ҡулланыусылар өҫтәленә сифатһыҙ ризыҡ эләкмәһен өсөн Роспотребнадзорҙың төбәк идаралығы белгестәре 280 килограмдан ашыу 33 партия икмәк-ҡалас изделиеларын һәм 315 килограмлыҡ 114 партия кондитер ризыҡтарын яраҡһыҙ тип тапҡан һәм һатыуҙан алған. Сәбәбе — норматив документтарға тап килмәй, тип аныҡлыҡ индерҙеләр ведомствола.

Бынан алда Башҡортостанда 124 килограмлыҡ 18 партия һөт ризығы һатыуҙан алынғайны. Сәбәбе иһә яраҡлылыҡ ваҡытының уҙыуы, тауар-оҙатыу документтарының булмауы, һаҡлау шарттарын үтәмәү. Предприятие етәкселәренә бойороҡ яҙылған һәм 256 мең һумлыҡ суммаға административ хоҡуҡ боҙоу тураһында протокол төҙөлгән.

http://www.bashinform.ru/news/1229872-v-bashkirii-izyali-pochti-400-kg-nekachestvennykh-khlebobulochnykh-i-konditerskikh-izdeliy-/