Башҡортостанда 23 кеше талпан энцефалиты менән сирләгән, улар араһында балалар бар

ӨФӨ, 2018 йыл, 4 октябрь. /«Башинформ» мәғлүмәт агентлығы, Эльмира Сабирова/. Башҡортостанда талпан энцефалиты менән зарарланыуҙың 23 осрағы теркәлгән, улар иҫәбендә 17 йәшкәсә ике бала бар, тип хәбәр иттеләр «Башинформ» агентлығына Башҡортостан буйынса Роспотребнадзорҙан. Талпандарҙың әүҙемлек миҙгеле йомғаҡтары буйынса, мониторинг мәғлүмәттәренә ярашлы, медицина учреждениеларына талпандан тешләнгән 10113 кеше мөрәжәғәт иткән, уларҙың 1894-е - балалар.

Ведомствола билдәләүҙәренсә, вакцинация талпан энцефалитынан һаҡланыуҙың иң ышаныслы ысулы булып тора. Ваҡытында яһалған прививка ғына сирҙең ауыр һәм үлемесле формаларынан һаҡлай. Белгестәр киләһе йылда талпандарҙан һаҡланыу өсөн ағымдағы йылдың октябрь-ноябрь айҙарында уҡ прививка эшләтергә кәңәш бирә.

Вакцинацияны көҙгөһөн башлау, икенсе прививканы яҙ көнө — март-апрелдә яһатыу яҡшыраҡ, тип билдәләйҙәр Башҡортостан буйынса Роспотребандзорҙа. Беренсе һәм икенсе прививкалар араһында ҡулай ваҡыт биш-ете ай тәшкил итә. Ике прививка алғандан һуң, тәбиғәттә талпандар күренә башлауға кешелә энцефалитҡа ҡаршы тора алыу һәләте барлыҡҡа килә. Ревакцинация вакцинация курсы тамамланғандан һуң бер йыл үткәс эшләнә. Артабан ревакцинация өс йылға бер тапҡыр уҙғарыла. Талпан энцефалитына ҡаршы прививканы поликлиникаларҙың прививка кабинеттарында эшләтергә мөмкин.

http://www.bashinform.ru/news/1220329-v-bashkirii-kleshchevym-entsefalitom-zaboleli-23-cheloveka-sredi-nikh-est-deti/