Баш ҡалала Ислам университеты Ҡаҙағстан имамдары өсөн квалификация күтәреү курстары ойоштора

ӨФӨ, 2018 йыл, 4 октябрь. /«Башинформ» мәғлүмәт агентлығы, Әлим Фәйезов/. Башҡортостан делегацияһы Ҡаҙағстан Республикаһының Уральск ҡалаһында үткән «Донъяуи дәүләт: закондың һәм диндең үҙ-ара эшмәкәрлеге» халыҡ-ара конференцияһында ҡатнашты.

Форумда фекер алышыуға күтәрелгән төп темаларҙың береһе – дини экстремизм менән көрәшеү алымдары, шулай уҡ дин хеҙмәтселәренең хоҡуҡи белемен күтәреү юлдары. Тема ярайһы уҡ көнүҙәк, сөнки һуңғы ваҡытта Яҡындағы Көнсығыш илдәренең билдәле бер төркөмдәре социаль селтәрҙәр менән әүҙем файҙалана, уларҙа мосолман туғандарын хәрби джихад эшләргә саҡыра, бының өсөн Сүриәгә барыу һәм һуғышыу мотлаҡ түгел тип аңалата.

Ҡыҙғанысҡа ҡаршы, форумда ҡатнашыусылар билдәләүенсә, бындай пропагандағы ҡайһы бер кешеләр, айырыуса йәштәр яуап бирә. Сәбәптәрҙең береһе дин әһелдәрен насар әҙерләүгә ҡайтып ҡала.

Ошо хаҡта форумда Башҡортостан делегацияһы етәксеһе, Рәсәй мосолмандары Үҙәк диниә назаратының Рәсәй ислам университеты проректоры Мөрсәл Әхмәтов һөйләне. Ул Ҡаҙағстан имамдарын ошо уҡыу йортонда квалификация курстарын үтергә саҡырҙы. Шул уҡ ваҡытта уҡытыу, йәшәү һәм Өфөгә килеү буйынса бөтә сығымдарҙы үҙенә ала. Был тәҡдимде форумда ҡатнашыусылар рәхмәт менән ҡабул итте, шул хаҡта Ҡаҙағстан мосолмандары Диниә назараты Юғары мөфтөйө Ораз Серек-бай Кажы әйтте, тип хәбәр иттеләр Рәсәй мосолмандары Үҙәк диниә назаратының Рәсәй ислам университетында.

http://www.bashinform.ru/news/1220167-islamskiy-universitet-v-ufe-organizuet-dlya-imamov-kazakhstana-kursy-povysheniya-kvalifikatsii-/