Башҡортостанда 635 меңдән ашыу кеше киҙеүҙән прививка эшләткән

ӨФӨ, 2018 йыл, 2 октябрь. /«Башинформ» мәғлүмәт агентлығы, Эльмира Сабирова/. Башҡортостанда грипты һәм ОРВИ-ҙы иҫкәртеү маҡсатында халыҡты иммунизациялау кампанияһы дауам итә.

Әлеге ваҡытта халыҡ йышыраҡ вируслы сирҙән һаҡлана. Әйтәйек, Роспотребнадзорҙың Башҡортостан Республикаһы буйынса бүлеге начальнигы вазифаһын башҡарыусы Зөһрә Шаһиева һүҙҙәренсә, бөгөнгә республикала 635 меңдән ашыу кеше прививка яһатҡан, йәки төбәктәге халыҡ һанынан 15,6%. Шул иҫәптән федераль бюджет иҫәбенә 633,9 мең кешегә прививка яһалған, уларҙың 487 меңе — өлкәндәр, 146 меңе — балалар. 2,4 мең кеше эш биреүселәрҙең һәм үҙ аҡсаһына прививка эшләткән.

Алдағы эпидемик миҙгелдә Башҡортостанда 1,6 миллион кешегә, шул иҫәптән 350 мең балаға грипҡа ҡаршы прививка яһау күҙаллана.

Хәтерегеҙгә төшөрәбеҙ, халыҡтың юғары хәүеф янаған төркөмдәренә: хроник сирле балаларға, йөклө ҡатын-ҡыҙҙарға, 60 йәштән өлкәндәргә, хәрби хеҙмәт йәшендәгеләргә, медицина, мәғариф хеҙмәткәрҙәренә прививкалар федераль ҡаҙна иҫәбенә эшләнә.

Иҫкәртеү вакцинацияһы иҡтисади яҡтан аҡланған, сөнки эшкә һәләтле халыҡ араһында киҙеү менән сирләүҙе кәметергә мөмкинлек бирә. Сентябрь-октябрь — ошондай прививкалар яһатыу өсөн иң ҡулай ваҡыт.

Вакцинация мәсьәләләре буйынса республика буйынса Роспотребнадзорҙың ҡыҙыу бәйләнеш телефонына шылтыратырға мөмкин: 8-800-700-90-30, шылтыратыуҙар 15 октябргә тиклем иртәнге сәғәт 10-дан 4-кә ҡәҙәр ҡабул ителә.

http://www.bashinform.ru/news/1219243-privivku-ot-grippa-sdelali-svyshe-600-tysyach-zhiteley-bashkirii/