Төбәктә йыл башынан 29 меңгә яҡын сабый тыуған, улар араһында 4 өс игеҙ бала

ӨФӨ, 2018 йыл, 14 сентябрь. /«Башинформ» мәғлүмәт агентлығы, Гөлфиә Акулова/. Башҡортостанда быйыл туғыҙ ай эсендә 29 меңгә яҡын сабый тыуған, ҡағиҙә булараҡ, малайҙар күберәк. Был турала республика буйынса Социаль страховкалау фонды хәбәр итә.

Яңы тыуған сабыйҙар араһында 4 өс игеҙ бала. Быйыл тәүге өс игеҙ бала 5 ғинуарҙа Өфөлә донъяға килде, ошо хаҡта агентлыҡ йыл башында яҙғайны.

Йышыраҡ сабыйҙарҙың буйы - 52 сантиметр, ауырлығы - 3,2-3,4 килограмм. Балалар күп осраҡта ғәҙәттәгесә шаршамбы тыуған.

Элеккесә Башҡортостанда ғаиләлә икенсе бала тыуыу өҫтөнлөк итә. Республиканың ҙур ҡалаларындағы бала табыу йорттарында тыуғандар һанының артыу тенденцияһы күҙәтелә. Ул ҡатындарҙың сифатлы медицина хеҙмәте алыу маҡсатында бала табыу учреждениеһын һайлау хоҡуғы менән күберәк файҙаланыуы тураһында һөйләй. Һайлағанда йыш ҡына баш ҡала перинаталь үҙәктәренә өҫтөнлөк бирелә.

Билдәләнгән осорҙа «Бала табыу сертификаты» программаһы сиктәрендә Социаль страховкалау фондының Башҡортостан буйынса төбәк бүлексәһе медицина ойошмаларына 350 миллион һум самаһы күсергән. Был аҡсаларҙы ҡатындарҙың йөклө булыу осоронда медицина хеҙмәттәре өсөн ҡатын-ҡыҙҙар консультациялары, бала табыу йорттары һәм сабыйҙарҙы бер йәшенә тиклем күҙәтеү буйынса хеҙмәттәр өсөн балалар поликлиникалары – бөтәһе 85 медицина ойошмаһы алған.

http://www.bashinform.ru/news/1210880-v-bashkirii-s-nachala-goda-rodilos-okolo-29-tysyach-malyshey-sredi-nikh-4-troyni-/