Быйыл республикала талпандарҙың әүҙемлек осоро оҙаҡҡа һуҙыла

ӨФӨ, 2018 йыл, 14 сентябрь. /«Башинформ» мәғлүмәт агентлығы, Эльмира Сабирова/. Быйыл уҙған осорҙа Башҡортостанда йәшәүселәрҙең талпан тешләү сәбәпле мөрәжәғәттәре 2017 йылға ҡарағанда әҙерәк, тип хәбәр иттеләр кесе йома, 13 сентябрҙә, Башҡортостан буйынса Роспотребнадзор идаралығында. Ведомство мәғлүмәттәре буйынса, республиканың һаулыҡ һаҡлау учреждениеларына талпан тешләү осрағы менән 9733 кеше мөрәжәғәт иткән, былтыр – 10966 булған.

Талпандар әүҙемлегенең бер аҙға,11 процентҡа, кәмеү сәбәбе – һауа торошо. Төбәк ғалим-биологтары быйылғы һыуыҡ май айын хәтергә төшөрҙө. Уларҙың һүҙҙәренсә, ямғырҙар һәм һыуыҡтар ваҡытында талпандар аҙ әүҙем: түшәктән сыҡмай. Ҡоро эҫене лә яратмай, шуға күрә шундай һауа торошонда кәмей. Талпандар өсөн иң уңай һауа торошо – ямғырһыҙ уртаса йылы.

Ғәҙәттә талпандар республикала апрель-май айҙарында уяна. Әгәр быйыл, хәҙерге кеүек, бындай көҙгө һауа торошо дауам итһә, уларҙың әүҙемлек осоро ла оҙаҡҡа һуҙыла: уларға ҡышты үткәреү, ә инә талпандарға йомортҡа һалыу өсөн туйғансы туҡланырға кәрәк. Ямғырҙар башланһа, талпандар ҙа юҡҡа сыға, тип аңлатты биологтар.

http://www.bashinform.ru/news/1210779-kleshchi-v-etom-godu-kusayut-zhiteley-bashkirii-rezhe-chem-v-proshlom/