Башҡортостанда 140 кеше 150-шәр мең һум аҡса түләгән һәм хажға бара алмаған

ӨФӨ, 2018 йыл, 31 август. /«Башинформ» мәғлүмәт агентлығы/. Башҡортостандан 140 кеше хажға бара алмаған, тип хәбәр итә «Вся Уфа» телеканалы. Мәккәгә хаж ҡылыу өсөн улар Башҡортостан мосолмандарының Диниә назаратындағы бинаны ҡуртымға алған туроператорға 150-шәр мең һум аҡса түләгән. Ошонда эшләгән турфирма хеҙмәткәре аҡсаны алып ҡасҡан, компания һәм уның сайты хәҙер эшләмәй. Республикала йәшәүселәргә килтерелгән зыян күләме 21 миллион һум тәшкил итә. Хажға бара алмағандарҙың күпселеге республика Эске эштәр министрлығына һәм прокуратураға ғариза яҙған. Телекомпания мәғлүмәттәре буйынса, барыһы ла килешеү төҙөмәгән (араларында пенсионерҙар күп), тимәк, улар аҡсаны кире ҡайтарыуға дәғүә итә алмай.

«Татаринформ» агентлығы мәғлүмәттәре буйынса, Рәсәй диндарҙары өсөн хаж ойоштороу тирәләй ғауға тәүгә генә ҡупмай. Былтыр Мәскәүҙә «Урал-сервис» туроператорының йөҙгә яҡын клиенты, визалар менән проблемалар булыу сәбәпле, Мәккәгә оса алманы. Ул саҡта компания бының урынына бәләкәй хаж ойошторорға, ғибәҙәт ҡылыуҙы бер йылға күсерергә йәки аҡсаны кире ҡайтарырға вәғәҙә иткәйне.

http://www.bashinform.ru/news/1203844-v-bashkirii-140-palomnikov-zaplatili-po-150-tysyach-rubley-i-ne-smogli-sovershit-khadzh/