Башҡортостанда ауыл мәктәбенең спорт залын ремонтлауға 1 миллион һумдан ашыу бүленгән

ӨФӨ, 2018 йыл, 24 август. /«Башинформ» мәғлүмәт агентлығы, Әлим Фәйезов/. Белем көнөндә, 1 сентябрҙә, Күгәрсен районының Мәҡсүт ауылындағы урта дөйөм белем биреү мәктәбенең спорт залы ла балалар өсөн үҙ ишектәрен аса. Ул «Берҙәм Рәсәй» партияһының «Балалар спорты» проекты, шулай уҡ депутат наказына ярашлы ремонтланған. Ремонтҡа төрлө кимәлдәге бюджеттарҙан 1,117 миллион һум бүленгән. Уларҙың күпселек өлөшө федераль бюджеттан алынған — 934 мең һум, ҡалғаны — республика һәм урындағы ҡаҙнанан: 127 мең һәм 56 мең һум. Әлеге объект — һайлаусыларҙың Башҡортостандан Дәүләт Думаһы депутаты Зариф Байғусҡаровҡа наказы. Эштәр барышын ул үҙе күҙәтте. «Нур» яуаплылығы сикләнгән йәмғиәте белгестәре ҡыҫҡа ваҡыт эсендә елләтеү, йылытыу системаһын төҙөкләндерҙе, түшәмде көпләне, стеналарҙы һыланы һәм буяны. Залда спорт тамғаларын һыҙырға ғына ҡалды.

Быйылғы уҡыу йылында мәктәптә 186 бала белем ала. Спорт залында Сапыҡ, Ерекле, Үрге Һаҙ һәм Назаркин ауылы мәктәптәре уҡыусылары ла шөғөлләнер тип күҙаллана — дөйөм саралар уҙғарғанда 270-тән ашыу бала, тип хәбәр иттеләр муниципалитет хакимиәтенән.

http://www.bashinform.ru/news/1201143-v-bashkirii-na-remont-sportivnogo-zala-selskoy-shkoly-vydeleno-bolee-1-mln-rubley/