Өфөлә мәғариф буйынса республика кәңәшмәһенең фекер алышыу майҙансыҡтары эшләй

ӨФӨ, 2018 йыл, 10 август. /«Башинформ» мәғлүмәт агентлығы, Наталья Овчарук/. Бөгөн, 10 августа, Өфөлә мәғариф буйынса республика август кәңәшмәһе бара. Өфөләге Конгресс-холға дәүләт власы вәкилдәре, педагогика һәм мәғариф өлкәһендәге белгестәр уҙған уҡыу йылына йомғаҡ яһарға һәм киләсәккә пландар билдәләргә йыйылды.

Быйылғы кәңәшмәнең темаһы «Заманса хәүефһеҙ белем биреү мөхитен булдырыу» тип атала. Фекер алышыу майҙансыҡтары үҙ эшен башланы ла инде. Фекер алышыуҙарҙан һәм түңәрәк өҫтәлдәрҙән һуң пленар ултырыш уҙа. Мәғариф өлкәһендәге белгестәр уҡыусыларҙың база кимәлендәге күнекмәләрҙе үҙләштереүен, өс йәшкә тиклемге балаларҙы иртә үҫтереү өсөн шарттар тыуҙырыуҙы, һөнәри белем биреүҙе яңыртыуҙы, заманса инклюзив белем биреүҙе үҫтереү өсөн шартар булдырыуҙы тәьмин иткән яңы уҡытыу һәм тәрбиә алымдарын индереү мәсьәләләрен ҡарай.

Шулай уҡ август кәңәшмәһендә «Талант һәм уңыш» мәғариф фонды етәксеһе урынбаҫары, «Сириус» мәғариф үҙәгенең белем биреү программалары үҙәге етәксеһе Алексей Турчин, «Сириус» мәғариф үҙәгенең уҡытыу-методика үҙәге етәксеһе урынбаҫары Артем Лопатин, Рәсәй Мәғариф һәм фән министрлығының Эшсе кадрҙар әҙерләү һәм өҫтәмә һөнәри белем биреү өлкәһендәге дәүләт сәйәсәте департаменты директоры урынбаҫары Алексей Левченко, һөнәри белем биреү ойошмалары, ата-әсәләр берләшмәһе вәкилдәре сығыш яһай.

http://www.bashinform.ru/news/1195824-v-ufe-nachali-rabotu-diskussionnye-ploshchadki-respublikanskogo-avgustovskogo-soveshchaniya-po-obraz/