Бөгөн Өфөлә «Рәсәйҙә традицион ислам һәм Зәйнулла Рәсүлев» халыҡ-ара ғилми конференцияһы эшләй башлай

ӨФӨ, 2018 йыл, 5 июль. /«Башинформ» мәғлүмәт агентлығы, Гөлфиә Акулова/. Бөгөн Өфөлә Конгресс-холда пленар ултырышты тантаналы асып, күренекле башҡорт дин һәм ғилем белгесе Зәйнулла Рәсүлевтың тыуыуына 185 йыл тулыуға арналған «Рәсәйҙә традицион ислам һәм Зәйнулла Рәсүлев» халыҡ-ара ғилми конференцияһы үҙ эшен башлай. Форумды республика Хөкүмәте, Башҡортостан Башлығы ҡарамағындағы Дәүләт-конфессия мөнәсәбәттәре буйынса совет, Рәсәй Фәндәр академияһы Өфө федераль тикшеренеү үҙәгенең Тарих, тел һәм әҙәбиәт институты, Рәсәй мосолмандарының Үҙәк диниә назараты, Башҡортостан мосолмандарының Диниә назараты ойоштора.

Конференцияла Рәсәй мосолмандары тарихының көнүҙәк проблемалары, Зәйнулла Рәсүлевтың Рәсәйҙә традицион исламды һәм суфыйсылыҡты үҫтереүҙәге роле менән шөғөлләнеүсе күренекле Рәсәй һәм сит ил ғалимдары ҡатнаша.

Ғилми форум «Рәсәйҙә традицион ислам һәм Зәйнулла Рәсүлевтың уны үҫтереүгә индергән өлөшө», «Донъя диндәре һәм мәҙәниәттәренең тарихи контексында ислам һәм суфыйсылыҡ», «Динде өйрәнеүҙә яңы сығанаҡтар һәм яңы алымдар» секциялары буйынса уҙа.

6 июлдә тантаналы саралар Силәбе өлкәһенең Троицк ҡалаһында уҙғарыла. Бында VII «Рәсүлев уҡыуҙары: ислам Рәсәйҙең хәҙерге заман тарихында» бөтә Рәсәй ғилми-ғәмәли конференцияһы була. Шулай уҡ ҡатнашыусылар Зәйнулла Рәсүлев ерләнгән урынға бара. 7 июлдә Учалы ҡалаһында тантаналар ойоштороу, Зәйнулла Рәсүлевтың тыуған төйәгенә – Шәрип ауылына һәм изге Әүештауға барыу күҙаллана.

http://www.bashinform.ru/news/1182715-v-ufe-segodnya-nachinaet-rabotu-mezhdunarodnaya-nauchnaya-konferentsiya-traditsionnyy-islam-v-rossii/