Төбәктә өс федераль трассала юл ҡатламы хәүефһеҙлек нормаларына яуап бирмәй

ӨФӨ, 2018 йыл, 4 июль. /«Башинформ» мәғлүмәт агентлығы, Наталья Овчарук/. Башҡортостанда дүрт федераль трассала юл ҡатламы хәүефһеҙлек талаптарын боҙа. Был осраҡты республика прокуратураһы хеҙмәткәрҙәре тикшереү эштәре барышында асыҡланы. Атап әйткәндә, боҙоуҙар М-5 «Урал», М-7 «Волга», Р-240 «Өфө-Ырымбур», «Өфөнөң көнбайыш урау юлы» автомобиль юлдарында асыҡланған.

«Ҡайһы бер юл ҡатламы участкаларында тәгәрмәс эҙе барлыҡҡа килгән, барьер кәртәләре боҙолған, юл билдәләре һәм йәйәүлеләр үткәүелдәрен яҡтыртыу ҡорамалдары ҡуйылмаған», — тип асыҡлыҡ индерҙеләр төбәк прокуратураһының матбуғат хеҙмәтендә.

Билдәләп үтергә кәрәк, «Федераль юл агентлығының «Урал буйы» федераль автомобиль юлдары идаралығы» етәксеһе исеменә был боҙоуҙарҙы бөтөрөү тураһында йөкләмә бирелгән. Саралар ҡабул ителгән дә: төҙөүселәр менән 6 саҡрым М-5 «Урал», Р-240 «Өфө-Ырымбур» автомобиль юлын ремонтлауға килешеүҙәр төҙөлгән. Эштәр бөткәнгә тиклем тигеҙ булмаған урындар барлығы хаҡында иҫкәртеүсе ваҡытлыса юл билдәләре ҡуйылған, транспорттың иң юғары хәрәкәт тиҙлеге сикләнгән.

http://www.bashinform.ru/news/1182293-v-bashkirii-na-trekh-federalnykh-trassakh-dorozhnoe-pokrytie-ne-otvechaet-normam-bezopasnosti/