Башҡортостанда экологтар, урмансылар һәм уҡыусылар Ғәҙелша шарлауығында өмә үткәрҙе

ӨФӨ, 2018 йыл, 7 июнь. /«Башинформ» мәғлүмәт агентлығы/. Экология министрлығының Сибай бүлексәһе һәм Урман хужалығы министрлығының Баймаҡ бүлексәһе хеҙмәткәрҙәре Башҡортостандағы иң ҙур шарлауығы — Ғәҙелшала өмә үткәрҙе. Өлкәндәргә ошо көндә экскурсияға килгән Әбйәлил районы Хәлил ауылы уҡыусылары ла ҡушылды. «Беҙ балаларға ошо хоҙур урын хаҡында һөйләнек, республиканың Ҡыҙыл китабына индерелгән һирәк үҫемлектәрҙе күрһәттек, шул уҡ ваҡытта туристарҙан ҡалған 3 кубометрҙан ашыу сүп-сар йыйҙыҡ», — тип хәбәр итте Башҡортостандың Тәбиғәттән файҙаланыу һәм экология министрлығы Сибай территориаль комитетының әйҙәүсе эксперты Зәлиә Байгилдина.

Өс баҫҡыслы Ғәҙелша (Ибраһим) шарлауығы тәбиғәт ҡомартҡылары реестрына индерелгән һәм махсус һаҡланған тәбиғәт биләмәһе булып тора. Шарлауыҡтың бейеклеге – 15 метрға яҡын. «Матурлығы йыл миҙгеленә һәм яуым-төшөмгә ҡарап үҙгәрә. Яҙғыһын шарлауыҡ мул һыулы, гөрләп аға, иҫ киткес матур, тарлауыҡта аҡҡан һыу тауышы ишетелә. Ер өҫтөндә йәшмә ятҡылыҡтарын күрергә мөмкин», — ти һөйләнеләр Башҡортостандың Экология министрлығында.

http://www.bashinform.ru/news/1170578-v-bashkirii-ekologi-lesniki-i-shkolniki-proveli-subbotnik-u-vodopada-gadelsha/