Республика «Парктар маршы»на ҡушылды

ӨФӨ, 2018 йыл, 11 апрель. /«Башинформ» мәғлүмәт агентлығы, Гөлфиә Акулова/. 22 апрелдә бөтә донъяла «Парктар маршы» акцияһы башлана. Уны шулай уҡ Ҡурсаулыҡтар һәм милли парктар көнө тип тә атайҙар. Акция махсус һаҡланған тәбиғәт биләмәләрен — ҡурсаулыҡтарҙы, милли һәм тәбиғәт парктарын, заказниктарҙы һәм тәбиғәт ҡомартҡыларын яҡлау идеяһына вайымһыҙ булмағандарҙы берләштерә. Сараның төп маҡсаты — үҙенсәлекле тәбиғәт биләмәләре проблемаларына иғтибарҙы йәлеп итеү.

«Парктар маршы» акцияһы барышында тәбиғәт парктарында һәм заказниктарҙа экологик дәрестәр, фестивалдәр, ағас үҫентеләрен ултыртыу акциялары, өмәләр үткәреү ҡаралған. «Асылыкүл», «Ҡандракүл», «Ирәмәл» һәм «Мораҙым тарлауығы» тәбиғәт парктарында «Тәбиғәтте һаҡлайыҡ» плакаттар конкурсы уҙғарыла. Иң яҡшы эштәр Мәскәүгә Ҡырағай тәбиғәтте һаҡлау үҙәгенә ебәрелә.

2018 йыл Рәсәйҙә Ирекмән йылы тип иғлан ителгән, был йәштәрҙе үҙҙәренең киләсәген төҙөүгә йәлеп итеү өсөн өҫтәмә стимул булыуы ихтимал, тип ышаналар Экология министрлығында. «Парктар маршы»ның төп бурыстарының береһе — балаларҙы һәм йәштәрҙе тәбиғәтте әүҙем һәм аңлы рәүештә һаҡлауға йәлеп итеү. Акцияның девизы: «Йәштәр һәм тәбиғәт — дөйөм киләсәк».

http://www.bashinform.ru/news/1142647-bashkortostan-prisoedinilsya-k-marshu-parkov/