Рөстәм Хәмитов «Милләт йәшлеге» йәмәғәт премияһын тапшырыу тантанаһы ҡунаҡтары менән осрашты

ӨФӨ, 2018 йыл, 4 апрель. /«Башинформ» мәғлүмәт агентлығы/. Өфөләге Конгресс-холда Башҡортостан Башлығы Рөстәм Хәмитов V «Милләт йәшлеге» йәмәғәт премияһын тапшырыу тантанаһы ҡунаҡтары менән осрашты.

Әңгәмәлә Дәүләт Думаһы депутаттары Рима Баталова, Александр Карелин, Дмитрий Пирог, Федерация Советы ағзаһы Татьяна Лебедева, Рәсәй Паралимпия комитетының башҡарма комитеты рәйесе Павел Рожков, Рәсәйҙең атҡаҙанған артисы Диана Гурцкая һәм Халыҡ-ара ислам бизнесы ассоциацияһы президенты советнигы Абдула Муташгаджиев ҡатнашты.

Хәтерегеҙгә төшөрәбеҙ, Рима Баталованың «Милләт йәшлеге» төбәк йәмәғәт фонды «Милләт йәшлеге» йәмәғәт премияһы конкурсын 2014 йылдан алып ойоштора. Ул физик мөмкинлектәре сикле кешеләр араһында юғары ҡаҙанышлы спортты һәм инвалидтар спортын пропагандалауға, һаулыҡ мөмкинлектәре сикле йәш спортсыларҙы һәм уларҙың тренерҙарын, Башҡортостанда инвалидтар спортын үҫтереүгә ҙур өлөш индергән бағыусыларҙы, меценаттарҙы, эшлекле партнерҙарҙы, инвалидтарҙы социаль яраҡлаштырыу һәм паралимпия спорты проблемаларын әүҙем яҡтыртҡан баҫма, электрон киң мәғлүмәт сараларын дәртләндереүгә йүнәлтелгән.

Республика Башлығы проекттың инициаторы, паралимпия чемпионы һәм Дәүләт Думаһы депутаты Рима Баталованың эшмәкәрлеген юғары баһалап, ҡунаҡтарға премияны хуплауҙары өсөн рәхмәт белдерҙе.

– Һеҙ изге эш башҡараһығыҙ, спортҡа ынтылған балаларға ярҙам күрһәтәһегеҙ. Ҡаҙаныштар, һөҙөмтәләр ҙә бар. Һөҙөмтәләр – ул икенсел. Иң мөһиме, ошо балалар үҙҙәрен кәрәк итеп тоя һәм тормоштоң мәғәнәһен аңлай. Башҡалар ҙа уларҙан өлгө ала, – тине Рөстәм Хәмитов.

Осрашыу барышында Рима Баталова Башҡортостанда балалар адаптив спортын үҫтереү хаҡында һөйләне. Ул депутаттарға спортты, сәләмәт йәшәү рәүешен әүҙем пропагандалауҙары өсөн рәхмәт белдерҙе һәм республика етәкселегенә паралимпия хәрәкәтенә ҙур иғтибар бүлгәндәре өсөн рәхмәт әйтте.

Осрашыуҙа ҡатнашыусылар Башҡортостанда уңайлы мөхит булдырыу буйынса эш һөҙөмтәләрен ыңғай баһаланы, шул иҫәптән һаулыҡ мөмкинлектәре сикле спортсыларға ла. Улар әйтеүенсә, Рәсәйҙең бер нисә төбәге генә был темаға ҙур иғтибар бирә.

Республика Башлығы, үҙ сиратында, 2019 йылда халыҡ-ара балалар уйындарында сығыш яһау өсөн үҫмерҙәр паралимпия командаһын төҙөргә тәҡдим итте.

– Иң мөһиме, балалар үҙҙәрен башҡалар менән тиң итеп тойһон, – тип билдәләне Рөстәм Хәмитов. – Был Рәсәй төбәктәре һәм сит илдәр өсөн дә ҡыҙыҡлы булырға тейеш.

Әңгәмә барышында Өфөләге Затон биҫтәһендә Спорт әҙерлеге үҙәген төҙөү хаҡында ла һүҙ барҙы.

– Үҙәк арзан түгел, 3 миллиард һум. Беҙ уны үҙ аҡсабыҙға төҙөйбөҙ, ресурстар табабыҙ, – тине Рөстәм Хәмитов. – 2019 йылдың йәйендә был комплекс эшләй башларға тейеш. Киләһе йылда унда ҙур бассейн асыла. Халыҡ-ара балалар уйындарын унда ла үткәрергә ниәтләйбеҙ.Ҡунаҡхана һәм реабилитация үҙәге 2020-2021 йылдарға ҡала.

http://www.bashinform.ru/news/1138787-rustem-khamitov-vstretilsya-s-gostyami-tseremonii-vrucheniya-obshchestvennoy-premii-molodost-natsii/