Рәсәйҙә Кемероволағы янғында кешеләрҙең һәләк булыуына бәйле матәм көнө

ӨФӨ, 2018 йыл, 28 март. /«Башинформ» мәғлүмәт агентлығы, Ғәлиә Нәбиева/. Бөгөн Рәсәйҙә Кемероволағы «Ҡышҡы сейә» сауҙа үҙәгендә һәләк булғандарҙы иҫкә алыу буйынса матәм көнө. Дәүләт флагтары төшөрөлгән. Мәҙәниәт учреждениелары күңел асыу тапшырыуҙарын күсергән, телеканалдар һәм радиостанциялар эфир сеткаһын үҙгәрткән. Рәсәй төбәктәрендә иҫкә алыу акциялары үтә. Был көндө Кемеровола һәләк булғандар менән хушлашалар.

Кузбаста «Ҡышҡы сейә» сауҙа үҙәгендәге янғында һәләк булған 15 кешене ерләйәсәктәр. Бөтә Кемерово буйынса – сиркәүҙәрҙә, залдарҙа, ғибәҙәтханаларҙа мәрхүмдәр менән хушлашыу була. Тәүге йыназа уҡыуҙар шаршамбы көндө урындағы ваҡыт буйынса иртәнге сәғәт 11-ҙәрҙә башлана, тип хәбәр итә ТАСС.

25 мартта «Ҡышҡы сейә» сауҙа-күңел асыу үҙәгенең дүртенсе ҡатында янғын сыҡты. Һуңғы мәғлүмәттәр буйынса, 64 кеше янғын ҡорбаны булды, 25 мәйет танылған. Әлеге ваҡытта 12 кеше дауаханала ята, тағы ла 55 кеше өйҙә дауалана.

Рәсәй Президенты Владимир Путин Кемероволағы янғында кешеләрҙең һәләк булыуына бәйле 28 мартты матәм көнө тип иғлан итеү тураһында указға ҡул ҡуйҙы. Кемеровоның үҙендә дүшәмбе иғлан ителгән өс көнлөк матәм дауам итә.

http://www.bashinform.ru/news/1135503-rossiya-v-traure-po-pogibshim-pri-pozhare-v-kemerove/