Ауылға эшкә ҡайтҡан юғары белемле йәш белгестәргә түләүҙәр биш тапҡырға артты – Рөстәм Хәмитов

ӨФӨ, 2018 йыл, 14 март. /«Башинформ» мәғлүмәт агентлығы/. Юғары һәм урта махсус уҡыу йорттарын тамамлап, ауылға эшкә ҡайтҡан белгестәргә бер тапҡыр бирелә торған түләүҙәр, элекке йылдар менән сағыштырғанда, биш тапҡырға арттырылды. Башҡортостан Башлығы Рөстәм Хәмитов Өфөлә барған Агросәнәғәт форумының пленар ултырышында ошо турала белдерҙе.

– Күреүебеҙсә, халыҡтың күсенеүе һөҙөмтәһендә ауыл хужалығында белгестәргә ҡытлыҡ бар. Беҙ төрлө ярҙам сараларын файҙаланып, йәштәрҙе йәлеп итергә тырышабыҙ, – тине төбәк етәксеһе. – Атап әйткәндә, ауылға эшкә килгән юғары белемле белгестәргә – 500 мең, урта һөнәри белемгә эйә булғандарға 300 мең һум күләмендә бер тапҡыр бирелә торған түләү билдәләнде. Был 2015-2016 йылдар менән сағыштырғанда биш тапҡырға күберәк. Беҙҙә ошо маҡсатҡа 70 миллион һум самаһы аҡса һалынған.

Республика башлығы вуздарҙа студенттар өсөн һөнәрҙәр исемлеген заманса талаптарға ярашлы яңыртыуҙың мөһимлеген билдәләне.

– Ауыл хужалығында һөнәрҙәр йыйылмаһы составы үҙгәрәсәген аңлайбыҙ, – тип һыҙыҡ өҫтөнә алды Рөстәм Хәмитов. – Әлбиттә, робот техникаһы, һанлы системаға күсеү күҙаллана. Беҙ бөтөнләй икенсе кимәлдәге – заманса, белемле белгестәр кәрәк буласағын күрәбеҙ. Ресурстарҙы ошондай белгестәр әҙерләүгә йүнәлтәбеҙ.

http://www.bashinform.ru/news/1127914-vyplaty-vypusknikam-vuzov-priezzhayushchim-rabotat-na-selo-vyrosli-v-pyat-raz-rustem-khamitov/