Башҡорт ҡатын-ҡыҙҙары йәмғиәте автоуҙыш һәм юбиляр ҡатын-ҡыҙҙар араһында велоуҙыш ойоштора

ӨФӨ, 2018 йыл, 28 февраль. /«Башинформ» мәғлүмәт агентлығы, Ләйлә Аралбаева/. Башҡорт ҡатын-ҡыҙҙары йәмғиәте май айында автоуҙыш һәм велоуҙыш ойошторорға ниәтләй. Ойошманың рәйесе Гөлнур Ҡолһарина кисә ошо хаҡта белдерҙе. Автоуҙыштың маҡсаты — Башҡортостандың иҫтәлекле урындарында туҡталыш яһап, ҡала һәм райондар буйлап йөрөү.

Акцияны уҙғарыу тураһында ҡарар ойошма советында ҡабул ителде. Республиканың әүҙем ҡатын-ҡыҙҙарын сарала ҡатнашырға саҡыралар.

«Маҡсаттарыбыҙҙың береһе — билдәле башҡорт ҡатын-ҡыҙы Бәндәбикәне хөрмәтләп иҫкә алыу, киләсәктә ошо урындар халыҡ, шулай уҡ туристар өсөн изге урындарға әүерелһен ине. Беҙ уның исеме тергеҙелеүен һәм йәш быуындың уны онотмауын теләйбеҙ», — ти Гөлнур Ҡолһарина.

Имен булмаған ғаиләләргә, эскелеккә, суицидҡа, кредитҡа бәйле бик күп шылтыратыуҙар килә, тип хәбәр итте спикер. Автоуҙыш барышында халыҡҡа бушлай психологик һәм юридик ярҙам ойоштороу ҡаралған. «Берҙәм Рәсәй» партияһы булышлығында автоуҙышта ҡатнашыусылар иҫәбенә медиктарҙы — тар белгестәрҙе индереү күҙаллана. Ойошмала танылған мәҙәниәт эшмәкәрҙәре байтаҡ, шуға күрә акцияла концерттар, ижади осрашыуҙарға ла урын бар.

«Беҙгә ветеран ойошмаһы вәкилдәре мөрәжәғәт итте. Билдәле шағирә Гөлфиә Юнысова-Иҙелбаева автоуҙыш менән бергә юбиляр ҡатын-ҡыҙҙар араһында велоуҙыш уҙғарырға тәҡдим итте. Уға 70 йәш тула, һәм ул 70 саҡрым юл үтергә әҙер. Юбилярҙарҙың барыһын да ҡушылырға саҡырабыҙ», — тип өҫтәне Гөлнур Ҡолһарина.

http://www.bashinform.ru/news/1122888-obshchestvo-bashkirskikh-zhenshchin-organizuet-avtoprobeg-i-veloprobeg-zhenshchin-yubilyarov/