Ленинград блокадаһын өҙгән көндә республикала «Блокада икмәге» акцияһы уҙғарыла

ӨФӨ, 2018 йыл, 23 ғинуар. /«Башинформ» мәғлүмәт агентлығы, Әлфиә Әғлиуллина/. 26-27 ғинуарҙа Өфөлә, Башҡортостандың йәштәргә илһөйәрлек тәрбиәһе биреү һәм хәрби хеҙмәткә тиклемге әҙерлек үҙәгендә «Блокада икмәге» акцияһы барышында Ленинград блокадаһын өҙөүгә арналған саралар уҙғарыла. Проекттың ойоштороусылары — «Рәсәйҙең эҙәрмәндәр хәрәкәте» дөйөм Рәсәй йәмәғәт хәрәкәтенең төбәк бүлексәһе, «Еңеү ирекмәндәре» йәмәғәт хәрәкәте, «Берҙәм Рәсәйҙең Йәш гвардияһы» ойошмаһының Башҡортостандағы төбәк бүлексәһе, Башҡортостан Республикаһының «Йәш армияһы».

Йома, 26 ғинуарҙа, Өфөләге скверҙа (Ленин урамы, 10) теләгән һәр кем Бөйөк Ватан һуғышы осорондағы атыу ҡоралы макеттары менән таныша, Ленинград өлкәһендә һуғыш үткән юлдарҙа табылған экспонаттарҙы ҡарай ала. Шулай уҡ Ленинград блокадаһын өҙөүгә бағышланған листовкалар һәм блокада рецебы буйынса бешерелгән 125 грамлыҡ икмәк таратыу ҡаралған.

Шәмбе, 27 ғинуарҙа, төп саралар көндөҙгө сәғәт 2-нән 4-кә ҡәҙәр республиканың Хәрби Дан музейында уҙа. Акция барышында 1941 йылдың 28 авгусында һәләк булған һалдат Самсонов Иван Ивановичтың шәхси әйберҙәрен туғандарына тапшырыу, «Бөйөк һуғыш» — «Ленинград блокадаһы» циклынан документаль фильм ҡарау, Еңеү паркында Ленинград блокадаһын өҙөүгә бағышланған листовкалар һәм блокада рецебы буйынса бешерелгән 125 грамлыҡ икмәк таратыу күҙаллана. Сара Мәңгелек утҡа сәскәләр һалыу менән тамамлана.

http://www.bashinform.ru/news/1106918-v-godovshchinu-snyatiya-blokady-leningrada-v-bashkirii-proydet-aktsiya-blokadnyy-khleb/