Башҡортостан хөкүмәтендә социаль-яуаплы эш биреүселәр бүләкләнде

ӨФӨ, 2017 йыл, 20 декабрь. /«Башинформ» мәғлүмәт агентлығы/. Башҡортостан хөкүмәтендә Социаль-хеҙмәт мөнәсәбәттәрен көйләү буйынса өс яҡлы республика комиссияһының быйылғы йылда һуңғы ултырышы уҙҙы.

Уның барышында «Рәсәйҙең юғары социаль һөҙөмтәле ойошмаһы» бөтә Рәсәй конкурсының төбәк этабы еңеүселәрен бүләкләү тантанаһы булды. 2017 йылда конкурстың 9 номинацияһы буйынса 24 ойошма еңеүсе тип танылды. Төбәк этабында еңеү ойошмаға республиканың социаль-яуаплы эш биреүселәр реестрына инергә мөмкинлек бирә.

«Бер йыл эсендә республикала дөйөм эшһеҙлек кимәле 5,8 проценттан 5,3 процентҡаса кәмене. Был Рәсәйҙәге уртаса тенденцияға тап килә. Йыл башынан теркәлгән эшһеҙ граждандарҙың һаны 17 процентҡа тиерлек йәки 4 мең кешегә аҙайҙы һәм 1 декабргә 19,6 мең кеше тәшкил итте (2017 йылдың 1 ғинуарына – 23,6 мең). Теркәлгән эшһеҙлек кимәле 1,17 проценттан 0,98 процентҡа тиклем кәмене» — тип хәбәр итте Башҡортостандың ғаилә, хеҙмәт һәм халыҡты социаль яҡлау министры урынбаҫары Фәнүр Шәйхисламов.

Республиканың йәштәр сәйәсәте һәм спорт министры урынбаҫары Руслан Хәбибов студент отрядтарына йәлеп ителгән студенттарҙың квалификация мәсьәләһен хәл итеү буйынса сығыш яһаны. Башҡортостандың ғаилә, хеҙмәт һәм халыҡты социаль яҡлау министры урынбаҫары Юрий Мельников һәм республиканың Эш биреүселәр союзы рәйесе Владимир Шолом ултырышта ҡатнашыусыларға милли профессиональ квалификациялар системаһын булдырыу буйынса эш хаҡында һөйләне.

http://www.bashinform.ru/news/1095522-v-pravitelstve-bashkirii-nagradili-sotsialno-otvetstvennykh-rabotodateley/