Башҡортостанда яңы йыл алды хәйриә акциялары башланды

ӨФӨ, 2017 йыл, 1 декабрь. /«Башинформ» мәғлүмәт агентлығы, Әлим Фәйезов. Башҡортостанда Яңы йылға тиклем бер ай ҡалғас яңы йыл алды хәйриә акциялары башланды. Атап әйткәндә, Туймазы ҡалаһының 8-се урта дөйөм белем биреү мәктәбенең бишенсе класс уҡыусылары Шаран районы балалар йорто тәрбиәләнеүселәренең хәлен белешергә барҙы. Балалар өсөн Яңы йылға бүләк йыйыу саҡырыуына бик күп балалар һәм уларҙың ата-әсәләре яуап бирҙе. Бишенсе класс уҡыусыһы Тимурҙың әсәһе татлы бүләктәр өсөн үҙенсәлекле байрам тоҡтары текте. Өҫтәл уйындары һәм канцелярия кәрәк-яраҡтары һатып алынды, концерт номерҙары әҙерләнде, шулай уҡ ҡала агентлыҡтарының береһенән аниматорҙар саҡырылды. Балалар йорто тәрбиәләнеүселәре өсөн уҡыусылар ҙур концерт ҡуйҙы, ул матур һабын ҡыуығы сараһы менән тамамланды, тип хәбәр иттеләр Туймазы районы хакимиәтендә.