Өфө картаһында Башҡортостан буйынса Эске эштәр министрлығының легендар етәксеһенең исеме мәңгеләштерелде

ӨФӨ, 2017 йыл, 29 ноябрь. /«Башинформ» мәғлүмәт агентлығы, Ксения Калинина/. Өфөнөң Киров районында генерал Рыленко исемендәге урам барлыҡҡа килде. Ҡала советы Башҡортостан буйынса Эске эштәр министрлығының башланғысын хупланы. Хәҙер министрлыҡтың легендар етәксеһенең исеме ҡала картаһында мәңгеләштерелде.

Ведомствоның матбуғат хеҙмәтенән хәбәр итеүҙәренсә, әле был урам һалына ғына. Ул Пугачев һәм Софья Перовская урамдары араһындағы участкаларҙы берләштерә. Уның оҙонлоғо бер саҡрымдан ашыуыраҡ, киңлеге — 60 метр.

Ошо ваҡиғаның тап 2017 йылда булыуы символик мәғәнәгә эйә, сөнки быйыл Владимир Данилович Рыленкоға 90 йәш тулған булыр ине. Генерал Рыленко республиканың хоҡуҡ һаҡлау системаһын үҫтереүгә, енәйәтселеккә ҡаршы көрәшкә һәм йәмәғәт тәртибен һаҡлауға ҙур өлөш индерҙе. Уның ҡатнашлығында илдә тәүге тапҡыр хоҡуҡ боҙоусыларға өҙлөкһөҙ профилактик тәьҫир итеү системаһы тәжрибәһе файҙаланыла башланы. Уны СССР-ҙың Эске эштәр министрлығы хупланы һәм барлыҡ төбәктәрҙә ҡулланырға тәҡдим итте, махсуслаштырылған дежур частар булдырылды, оператив-зона контроле системаһы әҙерләнде, ул әле лә ғәмәлдә. Владимир Рыленко башланғысы менән 1970 йылда ҡалала СССР Эске эштәр министрлығының урта махсус мәктәбе асылды. Һуңынан ул Өфө юридик институты тип үҙгәртелде.