Баш ҡалала теләгән һәр кем татар теленән белемен һынап ҡарай ала

ӨФӨ, 2017 йыл, 24 ноябрь. /«Башинформ» мәғлүмәт агентлығы, Гөлфиә Акулова/. 25 ноябрҙә Мәскәү ваҡыты буйынса иртәнге сәғәт 10-да туғыҙ илдә һәм Рәсәйҙең 20 төбәгендә «Татарса диктант» акцияһы уҙа. Акцияны ойоштороусылар — Бөтә донъя татар йәштәре форумы. Өфөлә сараны ойошторорға М. Аҡмулла исемендәге Башҡорт дәүләт педагогия университеты ярҙам итә. Акция грамоталы яҙыуға ҡыҙыҡһыныуҙы арттырыуға, татар әҙәби телен өйрәнеүгә йүнәлтелгән.

Иртәгә Ҡазан, Мәскәү, Төмән, Ижевск, Екатеринбург, Һарытау, Новосибирск ҡалаларында йәшәүселәр үҙҙәренең белемен тикшерә. Бынан тыш, теләге булғандар Ҡаҙағстанда, Ҡырғыҙстанда, Германияла, Ғәрәп Әмирлектәрендә, Америкала, Украинала, Чехияла, Азербайжанда һәм АҠШ-та ла диктант яҙа ала. Ҡатнашыусыларға татар яҙыусыһы Аяз Ғиләжевтың «Йома көн кис менән» повесынан өҙөк тәҡдим ителә. Татар теленән диктантты филологтар, профессорҙар һәм филология фәндәре докторҙары тикшерә. Диктант тексын атҡаҙанған сәнғәт һәм мәҙәниәт эшмәкәрҙәре, яҙыусылар һәм алып барыусылар уҡый.

Өфөлә «Татарса диктант» көндөҙгө сәғәт 12-лә башлана. Адресы: Октябрь революцияһы урамы, 3а, 409-сы аудитория.