Республиканың баш ҡалаһында WorldSkills Russia тармаҡ чемпионатына ауыл хужалығы машиналарын белеүселәр йыйыла

ӨФӨ, 2017 йыл, 15 ноябрь. /«Башинформ» мәғлүмәт агентлығы, Әлим Фәйезов/. Бөгөн Башҡорт дәүләт аграр университетында «Ауыл хужалығы машиналарын файҙаланыу» компетенцияһы буйынса WorldSkills Russia тармаҡ чемпионаты асыла. Ул 19 ноябргә тиклем дауам итә. Чемпионаттың маҡсаты — эшсе һөнәрҙәрҙең абруйын арттырыу һәм профессиональ белем биреүҙе үҫтереү, компетенцияларҙың иҡтисади үҫеш һәм шәхси уңыш өсөн мөһим икәнлеген күрһәтеү.

Ауыл хужалығы өлкәһендә тармаҡ чемпионаттары 18-28 йәшлек ҡатнашыусыларға — кесе, урта һәм ҙур эшҡыуарлыҡ предприятиелары хеҙмәткәрҙәренә йүнәлтелгән.

Быйыл ауыл хужалығы компетенциялары буйынса WorldSkills Russia тармаҡ чемпионаттары илдә тәүге тапҡыр уҙғарыла. 27-29 сентябрҙә Краснодарҙа И.Т. Трубилин исемендәге Кубань дәүләт аграр университетында «Агрономия» компетенцияһы буйынса тармаҡ чемпионаты үткәйне. 30 октябрҙән 1 ноябргә тиклем Ставрополь дәүләт аграр университетында «Ветеринария» компетенцияһы буйынса чемпионат ойошторолдо.

Өфөләге чемпионатта илдең 15 төбәгенән: Кемеров, Тамбов, Ульяновск, Төмән, Орел, Ырымбур, Һамар, Белгород, Свердловск, Силәбе өлкәләренән, Башҡортостандан, Татарстандан, Ҡырымдан, Ставрополь һәм Краснодар крайҙарынан конкурсанттар ҡатнаша.

Конкурсанттарҙың эшен Башҡортостандың агоросәнәғәт комплексы предприятиелары — «Центральный» матди-техник тәьминәт дәүләт унитар предприятиеһы, «Башсельхозтехника», «Агролайн», «Техресурс», «Акрос» яуаплылығы сикләнгән йәмғиәттәре вәкилдәре баһалай, тип хәбәр иттеләр республика Хөкүмәтенең матбуғат хеҙмәтенән.