Республикала «Рәсәй йылғаһы» акцияһы барышында Ыҡ буйы сүп-сарҙан таҙартылды

ӨФӨ, 2017 йыл, 14 ноябрь. /«Башинформ» мәғлүмәт агентлығы, Ольга Мортазина/. Башҡортостанда «Рәсәй йылғаһы» акцияһы барышында Бишбүләк, Йәрмәкәй, Туймазы райондары буйлап аҡҡан Ыҡ буйы сүп-сарҙан таҙартылды. Был республикала иң ҙур һөҙөмтә булды, тип хәбәр иттеләр Башҡортостандың Экология министрлығынан.

«Дөйөм алғанда, туғыҙ район һәм Октябрьский ҡалаһы халҡы акцияға әүҙем ҡушылды — бөтәһе 3,73 мең кеше. Улар — «Йәш Гвардия», «Еңеү ирекмәндәре», «Балалар — балаларға» хәрәкәттәрендә ҡатнашыусылар. Таҙартыу эштәрен башҡарғандан һуң беҙ иҫтәлекле альбом яһаныҡ һәм эстафетаны күршеләргә тапшырҙыҡ — артабан Ыҡ Татарстан биләмәһе буйлап аға», — тип һөйләне ведомствоның Туймазылағы идаралығы начальнигы урынбаҫары Ирина Хафизова.

Шулай уҡ республиканың Дыуан, Мәсетле, Ҡыйғы, Учалы, Мәләүез райондары акцияла әүҙем ҡатнашты, тип хәбәр иттеләр Экология министрлығынан. Бер йәйҙә 750 һыу объекты яры таҙартылды, уларҙың күбеһе йәмәғәт контроленә алынған. Башҡортостан йылғалары буйында 713,5 мең кубометрҙан ашыу сүп-сар йыйылған.