Республика эске эштәр органдарына матди-техник базаларын нығытыу йәһәтенән булышлыҡ итәсәк – Рөстәм Хәмитов

ӨФӨ, 2017 йыл, 13 ноябрь. /«Башинформ» мәғлүмәт агентлығы/. Республика эске эштәр органдарына, шул иҫәптән матди-техник базаларын нығытыу йәһәтенән артабан да булышлыҡ итәсәк. Был турала Башҡортостан Башлығы Рөстәм Хәмитов Рәсәй Федерацияһы Эске эштәр органдары хеҙмәткәрҙәре көнөнә арналған тантаналы йыйылышта белдерҙе.

- Былтыр республикала йәмәғәт именлеген тәьмин итеү буйынса дәүләт программаһын тормошҡа ашырыуға саралар күләме бөтә финанслау сығанаҡтары иҫәбенә 24 миллион һумға артты һәм 46 миллион һумға тиерлек етте, шул иҫәптән бөтә ерҙән дә үтә алған 15 автомобиль һатып алынды, – тип һөйләне Рөстәм Хәмитов. – Быйыл махсус транспорт саралары ҡорамалдарын, оргтехника, элемтә һәм видеотеркәү сараларын алыуға аҡса бүленде. Республика ҡаҙнаһы иҫәбенә Белоретта һәм Бәләбәйҙә дөйөм 530 миллион һумлыҡ район полиция бүлексәләре төҙөлдө.