Башҡортостанда эҙәрмәндәр һәләк булған ҡыҙылармеец Павел Сухихтың туғандарын эҙләй

ӨФӨ, 2017 йыл, 31 октябрь. /«Башинформ» мәғлүмәт агентлығы, Ғәлиә Нәбиева/. Башҡортостан эҙәрмәндәре һәләк булған ҡыҙылармеецтың туғандарын эҙләй. Республикала йәшәүселәр тағы бер яҡташыбыҙға һуғыштан әйләнеп ҡайтырға ярҙам итә ала.

«Рәсәй эҙәрмәндәр хәрәкәте»нең төбәк бүлексәһе етәксеһе Владимир Волков әйтеүенсә, 2017 йылдың көҙөндә Псков өлкәһе Себеж районының Заситино ауылы янында «Онотолған батальон» эҙәрмәндәр отряды һәләк булған ҡыҙылармеецтың һөлдәһен тапҡан. Һалдаттың медальонын уҡып, уның кем икәнлеген асыҡлағандар. Ул — Сухих Павел Андреевич, 1911 йылда Көйөргәҙе районының Егорьевка ауылында тыуған. Яугирҙең ҡатыны — Сухих Мария Федоровна. Ҡыҙылармеец 170-се уҡсылар дивизияһының 391-се уҡсылар полкында хеҙмәт иткән. 1941 йылдың йәйенән хәбәрһеҙ юғалған тип иҫәпләнгән.

Эҙәрмәндәр яугирҙең туғандарын бәйләнешкә сығыуҙарын һорай. Телефон: 8-963-909-19-70 — Волков Владимир Сергеевич.