Ҡышҡыһын Башҡортостан юлдары тәүлек әйләнәһенә патруллек ителә

ӨФӨ, 2017 йыл, 30 октябрь. /«Башинформ» мәғлүмәт агентлығы, Дарья Петрова/. Башҡортостандың юл хеҙмәттәре ҡышҡы осорҙа эшләргә әҙерләнә. Республика Хөкүмәтенең тейешле бойороғо Башҡортостандың рәсми интернет-порталында баҫылған. Документҡа ярашлы, «Приуралье» федераль автомобиль юлдары идаралығы менән берлектә Башҡортостан Юл хужалығы идаралығына ҡар һырынтылары барлыҡҡа килгәндә һәм башҡа насар һауа шарттарында юл хеҙмәттәре эшен тәьмин итергә ҡушылған. Респулика ҡала-район хакимиәттәре башлыҡтарына кәрәкле техника бүлеү йәһәтенән ярҙам итергә кәңәш ителгән. Ҡар таҙартыу техникаһы тәүлек әйләнәһенә, шул иҫәптән ял һәм байрам көндәрендә эшләргә әҙер булырға тейеш, тип күҙаллана.

Шулай уҡ документ юлдарҙы ҡарҙан таҙартыу сиратын билдәләй: иң тәүҙә федераль һәм төбәк тәғәйенләнешендәге юлдар, һуңынан муниципаль-ара, өсөнсө сиратта дөйөм ҡулланыштағы автобустар һәм мәктәп автобустары йөрөгән урындағы юлдар таҙартыласаҡ.