Башҡортостандың баш ҡалаһында киң мәғлүмәт сараларында Экология йылын иң яҡшы яҡтыртыу конкурсына ғаризалар ҡабул ителә

ӨФӨ, 2017 йыл, 30 октябрь. /«Башинформ» мәғлүмәт агентлығы, Ләйлә Аралбаева/. 1 ноябрҙә Башҡортостан Республикаһының Матбуғат һәм киң мәғлүмәт саралары агентлығында киң мәғлүмәт сараларында Экология йылын яң яҡшы яҡтыртыу конкурсында ҡатнашыу өсөн ғаризалар ҡабул итеү башлана.

Бәйгелә республика, ҡала, район, берләштерелгән гәзит, журнал редакциялары, шулай уҡ республика электрон киң мәғлүмәт саралары (интернет, телевидение һәм радио) ҡатнаша ала. Конкурста 2017 йылдың 1 ғинуарынан 1 ноябренә тиклем баҫылып сыҡҡан материалдар тәҡдим ителә, уларҙың һаны сикләнмәй. Эштәр 2017 йылдың 10 ноябренә ҡәҙәр ҡабул ителә. Адресы: 450077, Өфө ҡалаһы, Киров урамы, 45, 420-се бүлмә, баҫма киң мәғлүмәт саралары бүлеге. Телефон: (347) 218-07-72.

Конкурсты ойоштороусылар — Башҡортостандың Матбуғат һәм киң мәғлүмәт саралары агентлығы, Тәбиғәттән файҙаланыу һәм экология министрлығы, Журналистар союзы. Маҡсаты — республиканың киң мәғлүмәт сараларын Рәсәй Федерацияһында һәм Башҡортостан Республикаһында Экология һәм махсус һаҡланған тәбиғәт биләмәләре йылы сараларын тулыраҡ яҡтыртыуға йәлеп итеү, йәмғиәттең иғтибарын экологик үҫеш, биологик төрлөлөктө һаҡлау һәм экологик хәүефһеҙлекте тәьмин итеү мәсьәләләренә йүнәлтеү.

Конкурс тураһында положение, ғаризаның формаһы ойоштороусыларҙың рәсми сайттарында баҫылған.