Башҡортостандан дизайнер Мәскәүҙә Mercedez-Benz Fashion Week Мода аҙналығында ҡатнашты

ӨФӨ, 2017 йыл, 27 октябрь. /«Башинформ» мәғлүмәт агентлығы, Гөлсәсәк Ханнанова/. Мәскәүҙә Mercedez-Benz Fashion Week — Көнсығыш Европаның абруйлы Мода аҙналығы барышында Рәсәй дизайнерҙарының 2018 йылдың яҙ, йәй миҙгелдәрендә модалы кейем-һалымдар коллекцияһы күрһәтелде. Улар араһында тәүге тапҡыр ZIYA коллекцияһы тәҡдим ителде, уның авторы — сығышы менән Башҡортостандан булған Мәскәү дизайнеры Зия Гараз. Ул «Мең дә бер кисә» тип аталған кейем-һалым линияһын әҙерләгәйне.

Зия Гараз Белоретта тыуып үҫкән, кейем-һалым конструктор-технологы белгеслеге буйынса Өфө технологик сервис институтын тамамлаған, һуңынан оҙаҡ ҡына Магнитогорскиҙа һәм Когалымда йәшәгән. Когалымда ZIYA исемле модалы кейемдәр тегеү ательеһын аса, Ханты-Мансиҙа, Нижневартовскиҙа һәм башҡа ҡалаларҙа конкурстарҙа, халыҡ-ара күргәҙмәләрҙә ҡатнашып, еңеүҙәр яулай. Шул саҡта уның моделдәренә конкурстарға жюри рәйесе сифатында килгән танылған дизайнер Вячеслав Зайцев иғтибар итә.

Бөгөн Зия Гараз Мәскәүҙә йәшәй һәм үҙенең элекке ательеһының исемен иҫтә ҡалырлыҡ брендҡа әүерелдереү бурысын ҡуя. Мәскәүҙә Mercedez-Benz Fashion Week Мода аҙналығында ул бәрхәттән ҡатын-ҡыҙҙар кейеме коллекцияһын тәҡдим итте. «Һәр ваҡыт миңә сағыу, көнсығыш буяуҙары оҡшай торғайны, һәм һинд стилендә уңайлы көндәлек кейем-һалым тегеү тураһында хыяллана инем. Хәҙер бәрхәт — туҡымалар араһында модала. Мин һуңғы ике аҙна эсендә генә Мода аҙналығы өсөн махсус рәүештә ун модель тектем. Артабан уларҙы күпләп тегергә ниәтләйем. Мәскәүҙәргә, шул иҫәптән баш ҡалабыҙҙа йәшәгән яҡташтарыма улар оҡшар тип ышанам», — тип һөйләне дизайнер.