Башҡортостанда инсультҡа ҡаршы көрәшкә арналған саралар бара

ӨФӨ, 2017 йыл, 25 октябрь. /«Башинформ» мәғлүмәт агентлығы, Гөлфиә Акулова/. 23-27 октябрҙә Өфөлә һәм республикала Бөтә донъя инсультҡа ҡаршы көрәш көнөнә бағышланған саралар уҙғарыла, тип хәбәр иттеләр мэриянан. Иҫкәртеү саралары инсультты һәм унан үлеү осраҡтарын кәметеү проблемаһын хәл итеүҙә ҙур әһәмиәткә эйә, шуға күрә Башҡортостанда ошо дата алдынан һаулыҡ һаҡлау белгестәре халыҡ өсөн профилактик саралар ойошторҙо. Улар халыҡтың инсульт, диспансерлаштырыу һәм һәм медицина тикшереүҙәрен ваҡытында үтеү, хәүеф факторҙарын төҙәтеү һәм физиологик параметрҙарҙы контролдә тотоу, шулай уҡ инсульт билдәләрен һәм улар күренгән осраҡта үҙаллы эш итә белеү кәрәклеге хаҡында белем кимәлен күтәреүгә йүнәлтелгән.

27 октябрҙә «Планета» сауҙа-күңел асыу комплексында «Бергәләп инсультҡа ҡаршы» акцияһы уҙа, унда күсмә мобиль комплекстарҙың эше ойошторола, скандинавса йөрөү буйынса күрһәтмә дәрестәр һәм башҡа саралар ҡаралған. Көндөҙгө сәғәт 2-лә башлана.