Башҡортостан студенттары Голдберг кубогын яуланы

ӨФӨ, 2017 йыл, 23 октябрь. /«Башинформ» мәғлүмәт агентлығы, Ғәлиә Нәбиева/. Мифтахетдин Аҡмулла исемендәге Башҡорт дәүләт педагогия универеситеты командаһы (BSPU_Team) «Голдберг кубогы 2017» бөтә Рәсәй командалы инженер ярышында абсолют I урынды яулап, 50 000 һум күләмендә төп бүләкте отто һәм 2018 йылда Тулузда (Франция) Fab14 халыҡ-ара форумына барыу мөмкинлегенә эйә булды. Башҡорт дәүләт педагогия университеты командаһы һәм бөтә Башҡортостан исеменән физика-математика факультеты студенттары – физика-астрономик белем биреү йүнәлеше магистранты Вәлиев Радион менән электроника һәм наноэлектроника һөнәре буйынса 2 курс студенты Егоров Алексей сығыш яһаны, тип хәбәр итә юғары уҡыу йортоноң матбуғат хеҙмәте.

Голдберг машинаһы – ул ғәҙәти булмаған алым менән ҡулланылған ябай материалдарҙан эшләнгән ҡатмарлы конструкция. Уларҙы ябай мәсьәләне сисер өсөн, мәҫәлән, лампаны ҡабыҙыу йәки шапылдатҡысты атыу өсөн домино нигеҙендә төҙөлгән төрлө-төрлө хәрәкәттәр сылбыры ярҙамында төҙөйҙәр һәм тоташтыралар. Хәрәкәт сылбыр буйынса, туҡтауһыҙ бер-бер артлы бара, уларҙың төрлөлөгө һәм финал һөҙөмтәлелеге инженерҙың фантазияһына ғына бәйле.

Голдберг машинаһын уйлап табыуға һәм уны төҙөүгә студенттар өс аҙнанан ашыу ваҡыт сарыф иткән.