Башҡортостанда һәләтле балалар өсөн лицей һәм балалар технопаркы барлыҡҡа киләсәк

ӨФӨ, 2017 йыл, 12 октябрь. /«Башинформ» мәғлүмәт агентлығы/. Яҡын ваҡыт эсендә Башҡортостанда һәләтле балалар өсөн махсуслаштырылған лицей һәм балалар технопаркы барлыҡҡа киләсәк. Ошо хаҡта Башҡортостан Башлығы Рөстәм Хәмитов Республика көнөнә арналған тантаналы йыйылышта белдерҙе.

- Һәләтле йәштәргә ярҙам итеү мөһим эш йүнәлеше булып тора. Мин физика-математика йүнәлешле һәләтле балалар өсөн мәктәп эргәһендәге интернат менән Республика лицейын булдырырға йомош ҡуштым, – тине төбәк етәксеһе. – Октябрь айының урталарында ҙур предприятиелар менән кооперация нигеҙендә өс майҙансыҡта «Башҡортостан кванториумы» балалар технопаркы асыласаҡ.

Хәтерегеҙгә төшөрәбеҙ, махсуслаштырылған физика-математика лицейын асыу идеяһы Рөстәм Хәмитовтың Башҡортостандың атҡаҙанған уҡытыусылары менән осрашыуҙа тикшерелде. Ошондай уҡыу йортоноң булыуы һәләтле балалар менән шәхсән эшләү өсөн кәрәкле шарттар булдырырға һәм уларға республикала артабан эшләү өсөн перспективалы варианттар тәҡдим итергә мөмкинлек бирәсәк.

«Башҡортостан кванториумы» технопаркы Стратегик башланғыстар агентлығы тарафынан раҫланған «Балаларға өҫтәмә белем биреү системаһының яңы моделе» программаһы сиктәрендә Республика балаларға белем биреү технопаркы нигеҙендә ойошторола. Ул өс майҙансыҡта эшләйәсәк, икәүһе – Өфөлә, берәүһе Благовещенда урынлашҡан. Концепцияға ярашлы, үҙәк уҡыусыларҙы төрлө өлкәләге инженер-конструкторлыҡ, тикшеренеү һәм проект эшмәкәрлегенә йәлеп итеүгә булышлыҡ итәсәк.