Башҡортостан Башлығы стипендияһына лайыҡ булған 100 талантлы баланың исемдәре асыҡланды

ӨФӨ, 2017 йыл, 12 октябрь. /«Башинформ» мәғлүмәт агентлығы, Эльмира Сабирова/. Башҡортостан Башлығы стипендияһына лайыҡ булған 100 талантлы уҡыусының исемдәре билдәле булды. Улар ағымдағы йыл дауамында ай һайын 700 һум күләмендә аҡсалата бүләк аласаҡ. Һәләтле балалар яҡшы уҡығандары, спортта, художество һәм музыкаль ижадында уңышҡа өлгәшкәндәре өсөн билдәләнде. Исемлектә – дөйөм белем биреү мәктәбе уҡыусылары һәм өҫтәмә белем биреү учреждениелары (музыка һәм спорт мәктәптәре, балалар сәнғәт мәктәптәре) тәрбиәләнеүселәре.

Башҡортостан Башлығының ҡарары республиканың рәсми хоҡуҡи мәғлүмәт интернет-порталында баҫылған.

Быйылғы уҡыу йылында стипендияның дәүмәле ике тапҡырға – 350-нән 700 һумғаса арттырылды. Республика Башлығы 2017 йылдың 31 июлендә тейешле Указға ҡул ҡуйҙы.