Республика көнөнә Иглин районында яңы мәктәп корпусы асылды

ӨФӨ, 2017 йыл, 10 октябрь. /«Башинформ» мәғлүмәт агентлығы/. 9 октябрҙә, Республика көнө алдынан Иглин ауылында 1-се мәктәптең яңы корпусын асыу тантанаһы уҙҙы. Әлеге ваҡытта бында меңдән ашыу уҡыусы белем ала, ул ғәмәлдәге нормативтарҙан бер нисә тапҡырға күберәк. Шуға күрше бинаның корпусын яңыртырға һәм унда башланғыс класс уҡыусылары өсөн кабинеттар эшләргә ҡарар ителде. Дәрестәр яңы корпуста байрамдан һуң башланасаҡ, — тип хәбәр иттеләр Иглин районы хакимиәтендә.

Ремонт эшләнгән бинала дүрт класс. Уларҙа уҡытыу ҡорамалдары, интерактив таҡталар, ноутбуктар, күргәҙмә әсбаптар ҡуйылған.

«Беҙҙең өсөн был корпус ҙур бүләк булды, сөнки балалар йылдан-йыл арта бара», — тип билдәләне мәктәп директоры Земфира Камалетдинова.

Шул уҡ көндө райондың иң яҡшы белгестәре маҡтау ҡағыҙҙары һәм рәхмәт хаттары менән билдәләнде. Уларға наградаларҙы муниципалитет башлығы Ғафуан Шәйхетдинов тапшырҙы.