Төбәктә эшләмәгән пенсионерҙар пенсияға өҫтәп социаль түләү аласаҡ

ӨФӨ, 2017 йыл, 4 октябрь. /«Башинформ» мәғлүмәт агентлығы, Гөлфиә Акулова/. Башҡортостанда эшләмәгән пенсионерҙар пенсияға өҫтәп социаль түләү аласаҡ, уның күләме пенсионерҙың йәшәү минимумы дәүмәленә бәйле билдәләнә. Был үҙгәрештәр «Башҡортостан Республикаһында ҡулланыусылар кәрзинен һәм йәшәү минимумын билдәләү тәртибе тураһында» Башҡортостан Республикаһы законының 4-се статьяһына үҙгәрештәр индереү тураһында»ғы закон проекты тарафынан ҡаралған. Төбәк Хөкүмәте Президиумы ултырышында закон проектын ғаилә, хеҙмәт һәм халыҡты социаль яҡлау министры Ленара Иванова тәҡдим итте.

«Өҫтәмә социаль түләү эшләмәгән пенсионерҙарға бирелә, уларҙың пенсия дәүмәле алған социаль ярҙам саралары иҫәбе менән пенсионерҙың йәшәү урыны буйынса Рәсәй Федерацияһы субъектында билдәләнгән йәшәү минимумы дәүмәленән түбәнерәк», – тип аңлатты Ленара Иванова.

2017 йылда пенсионерҙың йәшәү минимумы дәүмәле 8015 һум күләмендә билдәләнгән. Инфляция фараздарына ярашлы закон проекты менән уны 2018 йылда 8320 һумғаса арттырыу күҙаллана. Түләүҙәрҙе федераль ҡаҙна иҫәбенә Рәсәй Федерацияһының Пенсия фонды башҡарасаҡ. Республикала өҫтәмә социаль түләү алыусыларҙың һаны 138 меңләп пенсионер тәшкил итә.