Республиканың 100 йыллығына «Башҡортостан» ғилми порталы булдырыласаҡ

ӨФӨ, 2017 йыл, 4 октябрь. /«Башинформ» мәғлүмәт агентлығы, Гөлфиә Акулова/. Республиканың 100 йыллығын байрам итеүгә әҙерлек алдынан «Башҡортостан» ғилми порталы масштаблы проекттарҙың береһе булып тора. Уны әҙерләү менән «Башҡортостан энциклопедияһы» хеҙмәткәрҙәре шөғөлләнә. Ресурс республиканы федераль һәм халыҡ-ара кимәлдәге мәғлүмәт киңлегендә таныштырасаҡ. Унда урыҫ, башҡорт һәм инглиз телдәрендә мәҡәләләр табырға мөмкин буласаҡ. Порталдың нигеҙенә Башҡортостан энциклопедияһының электрон версияһы ятасаҡ.

«Ғилми белемдәрҙе системалаштырыу нигеҙендә портал онлайн-энциклопедиялар һәм башҡа ғилми мәғлүмәттәр базаһы менән ҡулланыуға юл асасаҡ, республика хаҡында компетентлы көнүҙәк мәғлүмәт сығанаҡтарын берләштерәсәк, — тип һөйләне «Башҡортостан энциклопедияһы»ның директоры Уйылдан Сәйетов. — Бер аҙҙан төбәк ресурсыбыҙ Рәсәйҙең милли интерактив порталына тоташа аласаҡ».