Өфө эргәһендә ике мең ылыҫлы үҫенте ултыртылды

ӨФӨ, 2017 йыл, 4 октябрь. /«Башинформ» мәғлүмәт агентлығы, Ольга Мортазина/. Өфө районының Шамонин ауылында йәшәүселәр «Йәшә, урман» акцияһына ҡушылды һәм ике мең ылыҫлы үҫенте ултыртты. Башҡортостандың Тәбиғәттән файҙаланыу һәм экология министрлығында хәбәр итеүҙәренсә, ағастарҙы «Сәләмәт планета» һәм «Тыуған урман» йәмәғәт ойошмалары килтергән. Эштәр урындағы мәктәп һәм ике балалар баҡсаһы биләмәһендә башҡарылды. «Был урында ылыҫлы ағастар үҙенән-үҙе үҫмәй, бында бөтөнләй урман юҡ. Шуға күрә уларҙы ултыртыу тирә-яҡ мөхит өсөн бик мөһим. Үҫентеләрҙе бөтә ҡағиҙәләр буйынса ултырттыҡ. Улар үҫеп китер, тип ышанабыҙ», — тине биология уҡытыусыһы Ирина Сәйетова.