Өфөлә баҫҡыс майҙансығында иҫерек әсәнең янында ете айлыҡ сабыйҙы тапҡандар

ӨФӨ, 2017 йыл, 3 октябрь. /«Башинформ» мәғлүмәт агентлығы, Гөлфиә Акулова/. Өфөлә баҫҡыс майҙансығында иҫерек әсәнең янында ете айлыҡ сабыйҙы тапҡандар. Баланы шунда уҡ 17-се ҡала клиник дауаханаһына оҙатҡандар, ҡыҙыҡай артабанғы яҙмышы хәл ителгәнгә тиклем шунда буласаҡ. Унда имен булмаған ғаиләләрҙән алынған балаларҙы, сабыйҙар йортонда тәрбиәләнгән етемдәрҙе, ата-әсәһе баш тартҡан балаларҙы шәфҡәт күрһәтеүселәр иҫәбенә «Беҙҙең балалар» фондының «Дауахана балалары» программаһы сиктәрендә ялланған махсус профессиональ бала ҡараусылар тәрбиәләй.

«Ошондай көҙгө һалҡын көндә Алиса яңғыҙы түгел. Һеҙҙең ярҙамығыҙ арҡаһында бала ҡараусылар уның хаҡында хәстәрлек күрә. Әле Алисаның документтарын әҙерләйҙәр, һәм әсәнең дә ҡыҙын кире алыу мөмкинлеге бар, ләкин, ҡыҙғанысҡа ҡаршы, хәҙер Сабыйҙар йортонан ғына. Уның барыһы ла һәйбәт булыр, тип өмөтләнәбеҙ», — тип хәбәр итә фонд хеҙмәткәрҙәре.

Белешмә. «Беҙҙең балалар» фонды — дәүләткә, коммерцияға ҡарамаған ойошма, ул ауыр хәлдә ҡалған балаларға ярҙам программаларын тормошҡа ашыра. «Дауахана балалары» программаһының эше шәхси ойошмаларҙың һәм кешеләрҙең иғәнәһе иҫәбенә түләнә. Иғәнә түләп, ата-әсәһе баш тартҡан балаларға ярҙам итергә мөмкин. Тулыраҡ мәғлүмәт ойошманың сайтында бирелгән.