Башҡортостанда «төньяҡ амурҙары»на мемориаль комплекс асылды

ӨФӨ, 2017 йыл, 3 октябрь. /«Башинформ» мәғлүмәт агентлығы, Гөлфиә Акулова/. Ғафури районының Красноусол ҡасабаһында башҡорт полктарының 1812 йылғы Ватан һуғышында ҡатнашыуына 205 йыл тулыуға бағышланған «Төньяҡ амурҙары» мемориаль комплексы асылды. Наполеон һуғышы осоронда француздар башҡорт яугирҙәрен тап шулай тип йөрөткән. «Башҡортостан» дәүләт телерадиокомпанияһы сюжетында ҡыйыу башҡорт атлыларының хәтерен мәңгеләштереү һәм һәйкәл асылыуы хаҡында бәйән ителә.

Наполеон армияһына ҡаршы һуғышыу өсөн төҙөлгән 28 башҡорт полкы һәр ҙур алышта ҡатнаша. Дошманды сигендереп, төньяҡ амурҙары Европаны азат итеүҙә өҙ өлөштәрен индерә. 1814 йылдың мартында рус армияһы составында туғыҙ башҡорт полкы Парижғаса барып етә.

Мемориаль комплекс халыҡтың аҡсаһына төҙөлгән. Һәйкәлде асыу сараһына урындағы халыҡ һәм хәрби-патриотик клубтарҙың вәкилдәре килгәйне. Тантананан һуң уҡтан атыу буйынса турнир ойошторолдо, унда ҡатнашыусылар 1812 йылғы Ватан һуғышы осорондағы кейемдә һәм ҡорал менән сығыш яһаны.