Башҡортостанда тарихи мираҫ объекттарын һаҡлап ҡалыу һәм тергеҙеү буйынса «Имән Ҡала» фонды ойошторолдо

ӨФӨ, 2017 йыл, 29 сентябрь. /«Башинформ» мәғлүмәт агентлығы, Ғәлиә Нәбиева/. Өфөлө «Имән ҡала» баш ҡаланың мәҙәни-тарихи һәм архитектура мираҫы объекттарын һаҡлап ҡалыуға һәм тергеҙеүгә булышлыҡ итеү фонды ойошторолдо. Яңы структура бөр төркөм дини объекттарҙы төҙөп бөтөү өсөн инвесторҙар эҙләүгә тотондо ла инде. Ул, тәү сиратта, Комсомол урамындағы сиркәү һәм «Әр-Рәхим» мәсете, тип аңлаттылар баш ҡала хакимиәтенең матбуғат хеҙмәтендә.

Шулай уҡ объекттар Сипайлово биҫтәһендә бар – төҙөлөш эштәре туҡтап ҡалған сиркәү һәм ҡаланың тарихи өлөшөндәге бер төркөм объекттар, атап әйткәндә, тарихи ҡиәфәтен юғалтҡан Хәким мәсете. Уларҙы тергеҙеү һәм улар менән эшләү өсөн тейешле инвестициялар кәрәк. Бының өсөн махсус рәүештә «Имән Ҡала» фонды ойошторолдо.

Фонд менән таныштырыу сараһы уҙған көндәрҙә Өфөнөң мәҙәни мираҫын һәм архитектура ҡомартҡыларын һаҡлап ҡалыу буйынса Йәмәғәт советында уҙҙы. Советтың маҡсаты – мәҙәни мираҫ һәм архитектура ҡомартҡыларын һаҡлау өлкәһендәге ҡануниәтте тормошҡа ашырыу буйынса эшмәкәрлекте әүҙемләштереү өсөн тарих һәм мәҙәниәт эшмәкәрҙәренең, власть органдарының, ижтимағи берләшмәләрҙең һәм ойошмаларҙың үҙ-ара эш итеүен тәьмин итеү.