Нидерландта башҡорт яугиренә һәйкәл асыу тантанаһы ғинуарға күсерелде

ӨФӨ, 2017 йыл, 14 сентябрь. /«Башинформ» мәғлүмәт агентлығы, Гөлфиә Акулова/. Нидерландта башҡорт яугиренә һәйкәл асыу тантанаһы сентябрҙән 2018 йылдың ғинуарына күсерелде. Һәйкәл Европаны Наполеон ғәскәрҙәренән азат итеүселәргә бағышланған. Ҙур әһәмиәткә эйә скульптураны Нидерландты Наполеон баҫҡынсыларынан азат итеүҙең 200 йыллыҡ юбилей саралары барышында 11 сентябрҙә асыу ҡаралғайны. Ләкин датаны күсерергә тура килде, сөнки Рәсәй яғынан аҡса күсмәне, тип хәбәр итә «Башҡортостан» дәүләт телерадиокомпанияһы.

200 йыл самаһы элек генерал Бенкендорф етәкселегендә башҡорттар Наполеон илбаҫарҙарын ҡыуыу өсөн Амстердамға юллана. Голландтар әлеге көнгә тиклем ошо ярҙам өсөн рәхмәтле һәм азат итеүселәр иҫтәлегенә тап ошо ваҡиғалар урынында: Гердерланд провинцияһында Эйссел йылғаһы буйында монументаль композиция асырға ниәтләй. Мемориалда граф Бенкендорф һәм башҡорт һыбайлыһы төшөрөлгән. Скульптура өҫтөндә Германияла Чехов, Югославияла Пушкин, Черногорияла Высоцкий, Нидерландта бөйөк княгиня Анна Павловна һәйкәлдәре, Швейцарияла Суворов бюсы һәм башҡа бик күп проекттар авторы, Рәсәйҙең атҡаҙанған рәссамы Александр Таратынов эшләй.

Был ваҡытта 30 сентябрҙә Ғафури районының Красноусол ауылында «төньяҡ амурҙары»на арналған скульптура комплексын асыу тантанаһы була. Комплекс асылғандан һуң бында уҡ атыусылар фестивале ойошторола.