Республиканың баш ҡалаһында аномаль ҡойма ямғырҙарҙың эҙемтәләре бөтөрөлдө - мэрия

ӨФӨ, 2017 йыл, 5 сентябрь. /«Башинформ» мәғлүмәт агентлығы, Ғәлиә Нәбиева/. 5 сентябргә ҡарай төндә ҡала хеҙмәттәре көсәйтелгән режимда 4 сентябрҙә көндөң икенсе яртыһында Өфөлә яуып үткән аномаль ҡойма ямғырҙарҙың эҙемтәләрен бөтөрҙө, тип хәбәр иттеләр баш ҡала хакимиәтендә. Яҡынса мәғлүмәттәр буйынса, ике сәғәт эсендә Өфөлә 115 миллиметр ямғыр яуған, был сентябрҙә Башҡортостандың баш ҡалаһы өсөн хас бер айлыҡ норманан ике тапҡырға күберәк. Айырыуса Киров, Совет, Октябрьский, Ленин райондары зыян күргән. Дим биҫтәһендә һәм Өфөнөң төньяҡ райондарында йәшәүселәр өсөн иһә ҡойма ямғырҙарҙың эҙемтәләре бик үк һиҙелмәне.

Коммуналь хеҙмәттәрҙең тиҙ һәм ойошҡанлы эшләүе арҡаһында бер сәғәт эсендә Өфөнөң төп магистралдәренән, сәғәт ярымда башҡа урамдарҙан һыу ағып бөттө. Ҡаланың торлаҡ ойошмалары ла йорт яны биләмәләренән ямғыр һыуҙарын ағыҙыу буйынса ҙур эш башҡарҙы. Баш ҡаланың ҡайһы бер райондарында һыуҙы һурҙырыу талап ителде.

Ҡала урамдарында ямғыр эҙемтәләрен бөтөрөү менән 1500 коммуналь хеҙмәт эшселәре һәм 300 берәмектән ашыу махсус техника шөғөлләнде. Төп көс юлдарҙы һәм тротуарҙарҙы таҙартыуға йүнәлтелде.

Өфөнөң «Ҡотҡарыу хеҙмәте 112» мәғлүмәт-диспетчер үҙәгенә ҡойма ямғыр башланғандан алып өфөләрҙән 200-ҙән ашыу шылтыратыу ҡабул ителгән. Уҙған тәүлектә бер ағас ҡолау осрағы теркәлгән, шулай уҡ халыҡтың мөрәжәғәттәре ҡоймаларҙың емерелеүенә, көслө ямғыр һөҙөмтәһендә биләмәләрҙе һыу баҫыуға ҡағылған. Бөтә ғаризалар ҙа тейешле хеҙмәттәргә тапшырылған, уларҙың үтәлеше контролгә алынған.