Өфөлә уҡыусы йәштәр өсөн «Һаумы, студент!» байрамы уҙғарыла

ӨФӨ, 2017 йыл, 31 август. /«Башинформ» мәғлүмәт агентлығы, Әлим Фәйезов/. Йома, 1 сентябрҙә, Белем көнөндә, Өфөләге Салауат Юлаев майҙанында ҡала йәштәре өсөн асыҡ һауала «Һаумы, студент!» байрамы үткәрелә.

Өфө хакимиәтендә хәбәр итеүҙәренсә, был — баш ҡалалағы ҙур байрамдарҙың береһе. Йыл һайын унда республикабыҙҙың төрлө уҡыу йорттарынан 10 меңдән ашыу студент ҡатнаша. Байрам программаһында алып барыусылар Филүс Ҡасимов, Йәмил Ишмөхәмәтов, Ғәзиз Әбделмәновтан шоу, уйындар һәм конкурстар, этнотөркөмдәр һәм төрлө уҡыу йортттары студенттары араһында квест, башҡорт эстрадаһы йондоҙҙарының концерты, шулай уҡ сәләмәт йәшәү рәүешенә өндәгән саралар ҡаралған.

Байрамдың идеяһы — йәмәғәтселектең республика халыҡтарының мәҙәни мираҫын һаҡлауға һәм популярлаштырыуға иғтибарын йүнәлтеү, йәштәр араһында толерантлыҡты һәм үҙ-ара аңлашыуҙы нығытыу.

Киске сәғәт 5-тә башлана.

Сараны ойоштороусылар — «Башҡортостан» ТРК ДУП-һы, «Юлдаш» радиоһы, Өфө һәм Киров районы хакимиәттәре, Башҡортостан халыҡтары ассамблеяһы, республиканың Халыҡтар дуҫлығы йорто, Ректорҙар советы, Бөтә Рәсәй Милләт-ара йәштәре союзы.