Төбәктә эш биреүселәр хеҙмәтте һаҡлау буйынса иҫкәртеү сараларына 278 миллион һум аҡса аласаҡ

ӨФӨ, 2017 йыл, 30 август. /«Башинформ» мәғлүмәт агентлығы, Әлфиә Әғлиуллина/. 2017 йылда Башҡортостанда хеҙмәтте һаҡлау буйынса иҫкәртеү сараларына 278 миллион һум йүнәлтелә. Производствола йәрәхәт алыуҙы һәм һөнәри сирҙәрҙе кәметеү буйынса иҫкәртеү сараларын финанслау сиктәрендә Рәсәй Социаль страховкалау фондының төбәк идаралығы бүлгән аҡсаны 2,5 меңдән ашыу эш биреүсе ала.

Башҡортостан буйынса Социаль страховкалау фондында хәбәр итеүҙәренсә, быйыл Башҡортостандың эш биреүселәре аҡсаның күпселек өлөшөн — 87,5 миллион һумдан ашыуын зарарлы шарттарҙа эшләгән хеҙмәткәрҙәрҙе шифахана-курорт дауалауына йүнәлтә. Тағы ла 76 миллион һумы — шәхси һаҡланыу сараларын һатып алыу, 68 миллион һумы мотлаҡ медицина тикшереүҙәрен үткәреү өсөн файҙаланыла. Хеҙмәт шарттарын махсус баһалауға яҡынса 20 миллион һум йүнәлтелә.

2010 йылдан фондтың төбәк бүлексәһе бүлгән аҡсаның суммаһы һәм финанслауҙы һорап мөрәжәғәт иткән эш биреүселәрҙең һаны 2,5 тапҡырға артҡан.

Уртаса алғанда, бер йыл эсендә республикала производствола меңдән ашыу бәхетһеҙ осраҡ теркәлә, тип билдәләнеләр ведомствола.