Башҡортостан уҡытыусылары яҡшы эш хаҡы өсөн Тажикстанға уҡытырға бара

ӨФӨ, 2017 йыл, 28 август. /«Башинформ» мәғлүмәт агентлығы, Ольга Мортазина/. Рәсәйҙән 30-лаған уҡытыусы август аҙағында Тажикстанға эшләргә юллана. Улар иҫәбендә – Башҡортостан, Татарстан, Дағстан, Кемеров һәм Кострома өлкәләре уҡытыусылары. Был турала «Рәсәй гәзите» хәбәр итә. Ҡабул итеүсе яҡ уларҙы торлаҡ һәм Тажикстан буйынса уртаса 14 мең һум эш хаҡы менән тәьмин итәсәк. Тағы ла 60 мең һумды уларға Рәсәй Мәғариф министрлығы өҫтәп түләй, ул медицина страховкаһын да бирә. Һөҙөмтәлә эш хаҡы 74 мең һум тәшкил итәсәк.

Рәсәй уҡытыусылары уҡытыу рус телендә алып барыласаҡ мәктәптәрҙә белем бирәсәк. Шулай уҡ унда 70 мең самаһы дана дәреслек оҙатыласаҡ, ул 20 тонна ауырлыҡтағы йөк. Уҡыу әсбаптарын оҙатыу тураһындағы бойороҡҡа Федерация Советы рәйесе Валентина Матвиенко ҡул ҡуйҙы.

Февраль айында Рәсәй вице-премьеры Игорь Шувалов ике ил президенттарының һөйләшеүҙәренән һуң Рәсәйҙең Тажикстанда 20 дөйөм белем биреү мәктәбен төҙөргә ниәтләнеүен хәбәр итте. Уларҙа дәрестәр рус телендә алып барыласаҡ, тип хәтергә төшөрә «Рәсәй гәзите».