Төбәктә «Бөрйән балы – башҡорт даны» халыҡ-ара этнофестивале үтәсәк

ӨФӨ, 2017 йыл, 7 август. /«Башинформ» мәғлүмәт агентлығы, Ләйлә Аралбаева/. Бөрйән районында «Аргыҙма» ерлегендә «Бөрйән балы – башҡорт даны» халыҡ-ара этнофестивале үтәсәк. Ҙур байрамды 19 августа уҙғарыу күҙаллана. Этнофестиваль программаһында – бал һәм умартасылыҡ продукттары сауҙа-күргәҙмәһе, солоҡ эшләү буйынса оҫталыҡ дәресе, «Иң яҡшы умарта», «Умартасылыҡ нигеҙендә ашамлыҡтар», «Иң яҡшы солоҡсо», «Иң тәмле бал» ижади конкурстар, күңел-асыу программаһы, спорт уйындары һәм ярыштар. Байрам ҡунаҡтарын башҡорт эстрадаһының йәш йондоҙҙары ҡатнашлығындағы концерт һәм дискотека көтә.

Халыҡ-ара бал этнофестивале уртарус бал ҡорто тоҡомоноң бөрйән популяцияһын һаҡлап ҡалыу, солоҡсолоҡто һәм умартасылыҡты популярлаштырыу маҡсатында уҙғарыла.

Байрам саралары иртәнге сәғәт 11-ҙә башлана.