«Медиалогия» Башҡортостандың киң мәғлүмәт сараларында йыш телгә алынған телеканалдарын атаны

ӨФӨ, 2017 йыл, 27 июль. /«Башинформ» мәғлүмәт агентлығы, Эльмира Сабирова/. «Медиалогия» Башҡортостандың киң мәғлүмәт сараларында йыш телгә алынған телеканалдарын атаны. Беренсе урында — Башҡортостан юлдаш телевидениеһы, 2017 йылдың тәүге яртыһында ул Рәсәйҙәге һәм сит илдәрҙәге киң мәғлүмәт сараларында 6300-ҙән ашыу тапҡыр телгә алынған. Икенсе урында «Башҡортостан» ДТРК-һы килә (3,5 мең хәбәр). Өсөнсөлә «Бөтә Өфө» ТРК-һы (577 хәбәр). Был хаҡта абруйлы «Медиалогия» компанияһында хәбәр иттеләр.

Рәсәйҙең федераль медиа ресурстарына — 1103, сит ил киң мәғлүмәт сараларына 38 телгә алыу тура килә, тип аңлатма бирҙеләр Башҡортостан юлдаш телеканалының матбуғат хеҙмәтендә.

Башҡортостан юлдаш телевидениеһын республикала һәм Рәсәйҙең биш меңдән ашыу ҡалаһында ҡарарға мөмкин. Шуның менән бергә тамашасыларҙың дөйөм һаны 40 миллион кешегә етә, спутниктың сигналын күп кенә сит илдәрҙә ҡабул итәләр. Шул арҡала Башҡортостан юлдаш телевидениеһы Рәсәйҙә ҙур төбәк телеканалдарының береһе булып тора.